Республикада 1 миңден ашык кен жайлары катталган
Учурда Кыргызстанда 51 категориядагы пайдалы казындыларга таандык 1 миңден ашык кен жайы каттоодо турат, бул тууралуу КРдин Табигый ресурстар министрлиги маалымдады.
Бул казындылар арасында баалуу жана түстүү металлдар, көмүр, углеводород ресурстары жана сирек жер элементтери бар. Министрликте белгилегендей, бул ресурстар өнөр жай, энергетика, курулуш жана жол оңдоо сыяктуу тармактардын өнүгүшү үчүн маанилүү.
Жалпы кен жайларынын 400гө жакыны өнөр жай иштеп чыгуу стадиясында же геологиялык изилдөө жана тажрыйбалык-өнөр жай иштерин өткөрүүдө. Калган 600дөй объект убактылуу токтотулган — алардын бир бөлүгү запастардын түгөнүшү себептүү, ал эми башка бөлүгү баалоону кайра карап чыгуу же казып алуу үчүн жаңы технологияларды киргизүүнү талап кылат, деп белгилешти ведомстводо.
«Эске алчу нерсе, көз карандысыздык алгандан бери геологиялык изилдөөлөргө тиешелүү көңүл бурулбай келген. Бирок учурдагы президенттин колдоосу менен 2024-жылы «Кыргызгеология» мамлекеттик ишканасына полиметаллдар жана сирек жер элементтерин казып алуу боюнча улуттук долбоорду ишке ашыруу үчүн жаңы тоо-кен жабдууларын сатып алуу үчүн 1 миллиард сом бөлүндү. 2024–2025-жылдарга ушул каражаттын 72%ын пайдалануу пландалууда», - деп кошумчалашты министрликте.
Маалыматка ылайык, 2021-жылдан 2025-жылга чейин өлкөнүн бюджетине тоо-кен компанияларынан 191 миллиард сомдон ашык каражат түшкөн. 2023-жылдын январь айынан сентябрь айына чейин 42,7 миллиард сом салык жана милдеттүү төлөмдөр жыйналган, бул 2024-жылдын ушул мезгилине салыштырмалуу 16 миллиард сомго көп.
Сүрөт www
