Буга чейин банктар тарабынан «кара тизме» киргизилген жарандар үч жылдан кийин кайрадан кредит алууга кайрылуу мүмкүнчүлүгүнө ээ болушат. Бул, финансылар, бюджет, ишкердик жана атаандаштыкты өнүктүрүү боюнча Жогорку Кеңештин комитети тарабынан биринчи окууда кабыл алынган мыйзам долбооруна байланыштуу мүмкүн болду.
Бул мыйзам долбоору жарандардын кредиттик ресурстарга жеткиликтүүлүгүн жеңилдетүүгө жана финансылык инклюзияны жакшыртууга багытталган. Атап айтканда, терс кредиттик маалыматтын сакталуу мөөнөтүн беш жылдан үч жылга чейин кыскартууну сунуштайт.
Документтин алкагында, 10 миң сомго чейин кредит алган карыз алуучулардын терс кредиттик тарыхы бир жылдан кийин жок кылынат деп каралган.
Бул өзгөртүүлөрдү киргизүү карыз алуучулардын финансылык жүгүн азайтууга, банктардан кайрадан кредит алууну жеңилдетүүгө жана чакан жана орто бизнес үчүн жакшы шарттарды түзүүгө жардам берет деп күтүлүүдө.
