Су ресурстары, айыл чарба жана кайра иштетүү өнөр жайы министрлигинин маалымат кызматы тарабынан берилген маалыматка ылайык, Кыргызстанда, Бишкекти кошкондо, 2026-жылдын июнь айына чейин белгилүү күндөрдө жергиликтүү фермерлер жана кол өнөрчүлөр социалдык мааниге ээ азык-түлүк товарларын сунуштай турган ярмаркалар уюштурулат.
Министрликтен белгилешкендей, учурда өлкөдө негизги азык-түлүктөрдүн жетишсиздиги жок жана запастар тиешелүү деңгээлде. Ярмарканын максаты — ички рынокту туруктуу камсыз кылуу жана калкка сапаттуу азыктарды жеткиликтүү баада сунуштоо.
Ар бир жекшемби жана шейшемби Бишкекте жергиликтүү мэрия менен кызматташтыкта ярмарка өтүп, анда тургундарга базар баасынан төмөн баада азыктар сунушталат.
Ярмаркаларга коюлган негизги милдеттерге баалардын өсүшүн токтотуу, социалдык жактан осал топтор үчүн азыктарды жеткиликтүү кылуу, жергиликтүү өндүрүүчүлөрдү колдоо жана ички рынокто туруктуулукту сактоо кирет.
Башкалаада ярмарка өткөрүүчү жайлар Т. Усубалиев атындагы аянтта, И. Раззаков жана Абдымомунов көчөлөрүнүн кесилишинде, ошондой эле Биринчи май районундагы Эркиндик бульварында жайгашкан.
Ярмаркалардын катышуучуларына коюлган талаптар: сунушталган товарлар санитардык-гигиеналык стандарттарга жооп бериши керек, баалар базар баасынан төмөн болушу шарт, ошондой эле райондук агрардык башкармалыктан тастыктоочу кат болушу талап кылынат.
Кошумча маалымат алуу үчүн (0312) 66 14 22 жана 0702 70 20 00 телефондоруна кайрылсаңыз болот.
