КР Счет палатасынын пресс-кызматынын сүрөтү.
Кыргызстан Счет палатасынын отчетуна ылайык, 2024-жылга жүргүзүлгөн аудиттин жыйынтыктары курулуш тармагында 1,58 миллиард сомдон ашык финансылык бузулуулар бар экенин көрсөткөн. Бул тууралуу мекеменин пресс-кызматы билдирет.
Текшерүү 2024-жылдын 1-январынан 31-декабрына чейин Курулуш, архитектура жана турак-жай-коммуналдык чарба министрлигинин, ошондой эле анын структуралык жана караштуу уюмдарынын ишин камтыды.
Аудит финансылык эсепке алуу, бюджеттик мыйзамдарды сактоо жана курулуш иштерин аткаруу боюнча бир катар системалык кемчиликтерди аныктады.
Атап айтканда, төмөнкү бузулуулар белгиленди:
- дебитордук карыз - 1 169,3 млн сом;
- курулуш-монтаждоо иштеринин баасын жана көлөмүн ашыруу - 166,1 млн сом;
- бюджеттик каражаттарды максатсыз пайдалануу - 85 млн сом;
- бирдиктүү казначейдик эсептен тышкаркы финансылык операциялар - 40,2 млн сом;
- айлык акы эсептөөлөрүндө каталар - 24 млн сом;
- эсепке алынбаган мүлк - 26,6 млн сом;
- капиталдык салымдар жана курулуш боюнча башка бузулуулар - 23,5 млн сом.
Жалпы суммасы 349,4 млн сомду калыбына келтирүү керек. Аудит учурунда 122,2 млн сом кайтарылды, бул жалпы сумманын болжол менен 35%ын түзөт.
Аудиттин жыйынтыктары боюнча Счет палатасы аныкталган бузулууларды жоюу, финансылык дисциплинаны бекемдөө жана бюджеттик каражаттарды пайдалануунун натыйжалуулугун жогорулатуу боюнча сунуштар жана көрсөтмөлөрдү иштеп чыкты, деп айтылат билдирүүдө.
