2014-жылдын 3-октябры күнү Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматы (Кыргызпатент) «Интеллектуалдык менчиктин ишкердиктеги ролу» темасында семинар өткөрдү.
Семинарга Кыргызстандын Соода-өнөржай палатасынын жана бизнес структураларынын өкүлдөрү катышты.
Семинар катышуучуларына Кыргызпатенттин төрагасынын орун басары Зина Исабаева жана ТПП КРнын биринчи вице-президенти Амангельды Давлеталиев саламдашуу сөзүн сүйлөштү.
Зина Исабаева өз сөзүндө товардык белгилердин жана өнөр жай үлгүлөрүнүн заманбап дүйнөдөгү ролун баса белгилеп, алардын өндүрүүчүлөр, ишкерлер жана керектөөчүлөр үчүн маанилүүлүгүн айтты.
Амангельды Давлеталиев Кыргызпатентке семинарды уюштурганы үчүн ыраазычылык билдирди жана товардык белгилердин ишкердикти өнүктүрүүдөгү мааниси цивилизациялуу, заманбап бизнеске мүнөздүү белгилер экенин кошумчалады.
Кыргызпатенттин товардык белгилер боюнча экспертиза бөлүмүнүн жетекчиси Эльмар Мукамбетов өз презентациясында товардык белгилердин келип чыгышы, алардын бизнес өнүгүүсүндөгү ролу жана мааниси тууралуу кенен айтып берди. Ал рыноктун өнүгүшү товардык белгилерди каттоонун зарылдыгын жаратканын белгиледи.
Товардык белгилер боюнча экспертиза бөлүмүнүн эксперти Ольга Бекбаева чет өлкөдөгү товардык белгилерди каттоо боюнча докладын сунуштап, алардын эл аралык каттоо процедурасы жана артыкчылыктары тууралуу айтып берди.
Өнөр жай үлгүлөрүнүн экономикалык мааниси жана бизнесдеги ролу тууралуу Кыргызпатенттин ойлоп табуулар, пайдалуу моделдер жана өнөр жай үлгүлөрү боюнча экспертиза бөлүмүнүн жетекчиси Арстанбек Бердалиев маалымат берди.
Семинар учурунда катышуучулар контрафакция жана продукциянын фальсификациясы, Кыргызстандын рыногундагы окшош товардык белгилер, Советтер Союзунун бренддерин каттоо жана продукциянын башка рынокторго чыгуу мүмкүнчүлүктөрү жана көйгөйлөрүн талкуулашты.
