2025-жылдын 10-ноябрында Женевада, БУУнун имаратында, Кыргыз Республикасынын туруктуу өкүлчүлүгү тарабынан уюштурулган сайд-ивент өттү. Иш-чара эл аралык куралсыздандыруу жана массалык кырып жок кылуучу куралдарды жайылтпоо режимин бекемдөөгө арналган жана «Ядролук куралды тыюу боюнча келишим жана Борбордук Азиядагы ядролук куралдан бош зона келишими аркылуу туруктуулук» деп аталган. Бул тууралуу Кыргызстандын Тышкы иштер министрлиги маалымдады.
Бул иш-чаранын өнөктөштөрүнүн арасында Ирландия, Казакстан, Тайланд жана БУУнун УВР, ЮНИДИР, МККК жана ICAN сыяктуу эл аралык уюмдар болду. Иш-чаранын катышуучулары Борбордук Азиянын ядролук куралдан бош регион катары маанилүүлүгүн жана эл аралык куралсыздандыруу архитектурасын бекемдөөгө кошкон салымын талкуулашты.
Кыргызстан глобалдык жана региондук куралсыздандыруу процессин колдоо өзүнүн тышкы саясатында артыкчылык экенин белгиледи. Талкуулардын жүрүшүндө региондогу коопсуздукту жана ядролук коркунучту азайтууга негиз түзгөн негизги эл аралык инструменттерге өзгөчө көңүл бурулду.
Ошондой эле талкуу учурунда ядролук куралды колдонуу жана өндүрүү натыйжасында жабыркаган региондор жана коомдор, ошондой эле алардын реабилитациясы жана туруктуу өнүгүшү үчүн эл аралык кызматташтыктын зарылдыгы боюнча суроолор көтөрүлдү.
Ядролук куралдан бош региондор арасында тажрыйба алмашуунун жана мамлекеттер, эл аралык уюмдар жана жарандык коом ортосундагы өз ара аракеттенүүнүн маанилүүлүгү белгиленди.
Мындан тышкары, катышуучулар Борбордук Азиядагы ядролук куралдан бош зона келишимин институционалдаштыруунун практикалык кадамдарын кабыл алуунун зарылдыгын белгилешти. ```
