Россия Федерациясынын президентинин басма сөз катчысы Дмитрий Песков Кыргызстандык мигранттардын Россиядагы көйгөйлөрү тууралуу пикир билдирди.
Ал мигранттардын өлкөдөгү жашоосун жөнгө салуу маанилүү тема экенин, бул тема дайыма талкууланып, эки тараптуу сүйлөшүүлөрдө да каралып жатканын белгиледи. Кечээ Кыргызстан менен болгон кеңейтилген сүйлөшүүлөрдүн жүрүшүндө Россиянын ички иштер министри бул маселе боюнча атайын билдирүү жасады.
Песковдун айтымында, Россия Евразия экономикалык бирлигинин (ЕАЭБ) негизги принциптерин камсыз кылууга жана Кыргызстандан келген жумушчу мигранттардын абалын жөнгө салууга умтулууда.
Ал баса белгиледи: «Биздин максат – мигранттар үчүн бардык мыйзамдар жана талаптарды аткарууну жеңилдетүү. Тилекке каршы, биз кээде жетишпей калабыз. Учурда тиешелүү каттоосу жок адамдардын саны кыйла көп – бул он миңдеген адамдар. Биз бул көйгөйдү чечүү боюнча иштеп жатабыз, жана биздин жакшы жана конструктивдүү кызматташтыгыбыз бул маселени чечүүгө мүмкүнчүлүк берет. Көйгөй бар, бирок аны ашыкча чоңойтпоо керек. Эки тарап тең аракет кылышы керек», — деп кошумчалады Песков.
