Башкы шаардык муниципалитетте Кыргыз Республикасынын Жогорку Кенешинин депутаттарын кезектен тыш шайлоого даярдык боюнча штабдын жыйыны өттү. Жыйын Бишкек мэри Айбек Джунушалиевдин жетекчилиги астында, укук коргоо органдарынын жана шаардык кызматтардын өкүлдөрүнүн катышуусунда өттү.
Жыйында башкы шаардагы төрт райондун жетекчилери участкалык шайлоо комиссияларынын даярдыгы жана аткарылган уюштуруу иштери боюнча отчет беришти. Айбек Джунушалиев шайлоо кампаниясы учурунда мыйзамдарды катуу сактоонун маанилүүлүгүнө көңүл бурду, процесске катышкан ар бир адамдын жеке жоопкерчилигин эске салды. Ошондой эле, шайлоо мыйзамдарын бузганы үчүн МТУ № 203 жетекчисин кызматтан убактылуу четтетүү жөнүндө маалымдады, бул боюнча кызматтык иликтөө дайындалды.
Мындан тышкары, Бишкек мэри укук коргоо органдарынын өкүлдөрүнө шайлоо күнү тартипти камсыз кылууну тапшырды. Жыйынды жыйынтыктап, район акимдерине жана шаардык кызматтардын жетекчилерине бардык уюштуруу-техникалык маселелерди, анын ичинде бардык участкалык шайлоо комиссиялары үчүн туруктуу электр энергиясын камсыз кылуу жана интернет байланышынын сапатын көзөмөлдөө маселелерин чечүү зарылдыгы белгиленди.
