Аймактык Ички иштер башкармалыгы тарабынан берилген маалыматка ылайык, 30-ноябрга белгиленген Жогорку Кеңештин депутаттарын шайлоонун алдында, Баткенде укук коргоо органдарынын кызматкерлеринин гарнизондук стройдук текшерүүсү өттү.
Иш-чарага Баткен облусунун Ички иштер башкармалыгынын кызматкерлери, шаардык жана райондук ички иштер бөлүмдөрүнүн өкүлдөрү, Ички иштер министрлигинин 707-аскердик бөлүгүнүн аскер кызматкерлери, Ички иштер министрлигинин Баткендин атайын багыттагы ротасынын жоокерлери, ошондой эле жол кыймылынын коопсуздугун камсыздоо кызматкерлеринин өкүлдөрү катышты.
Ички иштер башкармалыгынын начальниги, милициянын полковниги Улан Жукенов милиция кызматкерлеринин шайлоодо кызматтык милдеттерин аткарууга даярдыгын текшерди. Кышкы форманын талапка ылайык келүүсүнө жана кызматтык күбөлүктөрдүн туура түзүлүшүнө өзгөчө көңүл бурулду.
Шайлоо күнү миңден ашык милиция кызматкери Баткен облусунда тартипти камсыздап, укук бузуулардын алдын алууга жардам берет. Ар бир шайлоо участогунда милиция кызматкерлеринин жанына ыктыярчы элдик кошуундар жана ички иштер органдарынын ардагерлери кезектешет. Ошондой эле мүмкүн болгон укук бузууларга тез арада жооп берүү үчүн оперативдүү-тергөө топтору түзүлгөн.
28-ноябрдан 2-декабрга чейин милиция кызматкерлери күчөтүлгөн режимде иштешет.
