Региондук ИИБдин маалымат кызматына ылайык, 2026-жылдын 11-январында саат 13:10 чамасында Кемин районунун ИИБне Кемин шаарындагы үйлөрдүн биринде бычак жаракаттары бар өлүк эркек киши табылгандыгы тууралуу маалымат келип түшкөн.
Маалымат алгандан кийин окуя болгон жерге тергөө-оперативдик топ түзүлүп, жөнөп кетишти. Текшерүү учурунда Кемин шаарындагы үйлөрдүн биринде 1960-жылы туулган А.А. аттуу жарандын көптөгөн бычак жаракаттары менен өлүк денеси табылганы аныкталды. Дене моргго жөнөтүлүп, керектүү соттук-укуктук экспертизалар дайындалды.
Окуя боюнча Кылмыш кодексинин 122-беренесинде («Киши өлтүрүү») каралган кылмыш белгилери боюнча кылмыш иши козголду.
Тергөө учурунда 11-январь түнүндө маркум Б.Т. аттуу жарандын үйүндө, алардын тааныштары С.К. менен бирге алкоголь ичимдиктерин ичип жаткандыгы аныкталды. Кылмыш жасалгандан кийин С.К. окуя болгон жерден качып кеткен.
Оперативдүү-издөө иш-чараларынын натыйжасында милиция кызматкерлери шектүүлөрдүн жеке башын аныктап, кармашты. Бул Б.Т. жана С.К. аттуу жарандар, экөө тең 1960-жылы туулган. Алар убактылуу кармоо жайына жайгаштырылды.
Тергөө уланууда.
