Манас шаарында жаңы санариптик тез жардам диспетчердик кызматы иштей баштады, бул тууралуу Кыргыз Республикасынын Саламаттык сактоо министрлиги билдирүү жасады.
Бул система тез жардам чакырууларын башкарууну автоматташтырат: чакырууларды бригадаларга бөлүп, унаалардын кыймылын реалдуу убакытта көзөмөлдөп, диспетчерлерге актуалдуу маалыматтарга негизделген чечимдерди тез кабыл алууга мүмкүндүк берет.
Санариптик диспетчердик Манас жана Сузак районун камтыйт, тез медициналык жардамдын эффективдүү жана координацияланган көрсөтүлүшүн камсыз кылат. Система заманбап компьютерлер, мобилдик түзмөктөр, үзгүлтүксүз электр энергиясы менен камсыздоочу булактар жана картография жана аналитикалык инструменттер менен интеграцияланган программалык камсыздоо менен жабдылган.
Диспетчерлер жана фельдшерлер санариптик технологияларды колдонуу боюнча атайын окутуудан өтүшөт, бул чакырууларга жооп берүүнүн ылдамдыгын кыйла жогорулатууга жана бригадалардын бейтаптарга, анын ичинде алыста жайгашкан айылдарга жетишүү убактысын кыскартууга мүмкүндүк берет.
«Биз мындай инициативалар пилоттук долбоорлордун деңгелинде калбашын каалайбыз. Тез жардамдын санариптештирилиши бүткүл процесс болушу керек, кызматкерлерди окутууну, туруктуу колдоону жана жергиликтүү деңгээлге зарыл материалдарды өткөрүп берүүнү камтыйт. Ошол гана учурда система эффективдүү иштеп, бейтаптарга күн сайын пайда алып келе алат. Жаңы диспетчердик формат чакырууларга тезирээк жооп берүүгө жана бригадалар ортосундагы өз ара аракеттенүүнү жакшыртууга мүмкүндүк берет, биздин максат — бул тажрыйбаны өлкө боюнча жайылтуу», - деп белгиледи Кыргыз Республикасынын Саламаттык сактоо министринин орун басары Нургуль Аднаева.
Долбоорду ишке ашыруу Кыргыз Республикасынын Саламаттык сактоо министрлиги тарабынан Кыргыз-Германиялык тез медициналык жардамды санариптештирүү долбоорунун колдоосу менен жүргүзүлдү, бул долбоорду Германиянын эл аралык кызматташтык коомдоштугу (GIZ) ишке ашырууда.
Санариптик диспетчердик кызматты киргизүү Кыргызстандагы тез медициналык жардам системасын модернизациялоо жана саламаттык сактоодо санариптик чечимдерди киргизүүнүн бир бөлүгү болуп саналат.
