Алие 22 жашта, ал Ысык-Көл облусунда жайгашкан Каракол шаарынан. Учурда ал Дубайда жашап, «Emirates» компаниясында иштейт. Бул жерде бош орундар үчүн конкурс абдан катуу: жалпы талапкерлердин болгону 5% ийгиликтүү интервьюдан өтөт.
Алия үчүн авиация дайыма өзгөчө нерсе болуп келген, ал эркиндикти жана жаңы горизонтторду символдойт. Ал Муса Рыскулбеков атындагы Кыргыз экономикалык университетин бизнес башкаруу боюнча аяктаган жана Алматыдагы KIMEP университетинде академиялык мобилдүүлүк программасы боюнча билим алган. «Мен дайыма өзгөрүүлөргө жана жаңы ачылыштарга умтулгам, ошондуктан асманда иштөө мен үчүн табигый тандоо болду», — деп бөлүшөт ал.
Алия Астанада интервьюдан өткөн, ал бир күн бою — таңкы сегизден кечки алтыга чейин созулган. Үч күндөн кийин ал күтүлгөн «golden call» — Дубайда окууга чакыруу алды. ««Emirates Aviation College» колледжинде окуу эки айга созулду жана абдан интенсивдүү болду: күн сайын сабактар, тесттер жана практикалык машыгуулар. Мен учуп баштаганда, биринчи айым жонокой өттү», — деп эскерет Алия.
Иштей баштаган биринчи апталар анын үчүн кыйын болду: жаңы чөйрө, эрежелер жана жашоо ритми. «Бирок убакыттын өтүшү менен баары тааныш болуп калды. Эң негизгиси — тынч жана позитивдүү болуу. Азыр мен өзүмдү ишенимдүү сезип, чын эле жумушумдан ырахат алам», — деп белгиледи ал.
Ар бир рейс Алия үчүн уникалдуу окуя жана жаңы эмоциялар. «Биз жүргүнчүлөр үчүн өзгөчө нерселерди жасоого аракет кылабыз. Мисалы, эгер кимдир бирөөнүн туулган күнү болсо, биз он беш тилде кат жазып, сүрөт тартат. Эгер кимдир бирөө биринчи жолу учуп жатса, биз эскерүү сертификатын жана таттуу белек беребиз», — дейт ал.
Эң эсте калаарлык учурлардын бири күчтүү турбуленттүүлүк болду, ал учурда карылыктагы аял эсинен танып калды. «Бул чыныгы шок болду, бирок биз тез арада реакция кылып, жардам бердик. Баары жакшы болду. Ошол учурда мен биздин жумуштун канчалык маанилүү экенин түшүндүм, анткени кээде бизден бир адамдын өмүрү көз каранды», — деп кошумчалады Алия.
Алия кыргыз, орус жана англис тилдеринде эркин сүйлөйт. Бир айлык учууларында ал беш өлкөдө болуп, алдыда дагы алты жаңы багыт бар, бул жалпы ондон ашык өлкөнү түзөт.
Бош убакытында ал Fitme аялдар кийимдери боюнча бизнесин өнүктүрүп, моделингде өзүн сынап жатат. «Мен үчүн өнүгүүнү улантуу жана мени шыктандыра турган нерселер менен алектенүү маанилүү. Асманда иштөө дүйнөнү ачып, жашоого башка жактан карап көрүүгө мүмкүнчүлүк берет. Эң негизгиси — өзүңө берилүү жана алдыга жылуу», — дейт Алия.
Алия Шаршеева ар бир жаңы учуу жана ар бир өлкө анын кыялына, жаңы билимдерге жана ал асманда биринчи жолу сезген эркиндикке болгон кадам экенине ишенет.
