Инициатива алдын ала макулдашпастан сунушталды
Энергетика министрлиги «Чексиз» тарифинин киргизилиши менен байланыштуу «Кыргызстандын улуттук электр тармагы» акционердик коомунун бир нече кызматкерлерин дисциплинардык жоопкерчиликке тартуу жөнүндө билдирди.
Ведомстводон маалымдашкандай, күз-кыш мезгилинде электр энергиясын пайдалануу боюнча сунуш алдын ала макулдашпастан берилген. Бул коомчулукта кеңири резонанс жаратты.
Президент Садыр Жапаров мындай маселелерди электр энергиясынын жетишсиздиги шартында көтөрүү мүмкүн эместигин айтып, бул багытта кийинки аракеттерди токтотууну жана жарандардын электр энергиясына тең укуктуу жеткиликтүүлүгүн камсыздоону тапшырды. Бул боюнча Энергетика министрлиги «НЭСК» акционердик коомунун директорлор кеңешине компаниянын жетекчилигине тиешелүү чараларды көрүү өтүнүчү менен кат жөнөттү, - деп билдиришти ведомстводон.
Бүгүн НЭСКтин директорлор кеңеши төмөнкү кызматкерлерди дисциплинардык жоопкерчиликке тартуу чечимин кабыл алды:
- «Кыргызстандын улуттук электр тармагы» акционердик коомунун генеральдык директору И. М. Сыдыгалиев эскертүү алды;
- коммерциялык маселелер боюнча генеральдык директордун орун басары Дуйшо уулу Уларбек дагы эскертүү алды;
- электр энергиясын сатуу башкармалыгынын начальниги И. А. Орозбаев ээлеген кызматынан бошотулду.
Министрликтен билдиришкендей, электр энергиясынын жетишсиздигин жана коомчулуктун көңүлүн эске алып, «Кыргызстандын улуттук электр тармагы» акционердик коому калкка электр энергиясын үзгүлтүксүз камсыздоону камсыз кылышы керек.
Сүрөт www
