70 миңден ашык Кыргызстандын жарандары Россиянын кара тизмесине кирип калды. Бул тууралуу Эмгек, социалдык камсыздоо жана миграция министрлигинин жумуш менен камсыздоо боюнча чечимдерди даярдоо башкармалыгынын жетекчи адиси Саадаткул Муканбетова «Кабар» агенттигинин түз эфиринде билдирди.
Ал Россияда катуу миграциялык эрежелер киргизилгенден кийин министрлик Кыргызстандын РФдагы элчилиги менен биргеликте чет өлкөдө жүргөн кыргызстандыктарга жардам берүү үчүн кеңири консультациялык иштерди жүргүзгөнүн белгиледи. Натыйжада мигранттар Россия тараптын талаптарына жооп берген документтерин жаңырта алышты.
Мындан тышкары, Муканбетова учурда чет өлкөдөн кайтып келген 1 миң 200 Кыргызстандын жараны жумушсуздар реестрине катталганын кошумчалады. Алардын 1 миңи Россиядан, калган 200ү Казакстан, Түркия, Тажикстан жана башка өлкөлөрдөн келген.
