Иссык-Ата районунун жашоочуларынын айтымында, арыкка туруктуу түрдө химиялык заттар төгүлүп жатат.
Алар суунун түсү өзгөргөнүн жана күчтүү жыт пайда болгонун белгилешти.
«Биз, жашоочулар, ден соолугубуз жана балдарыбыздын ден соолугу үчүн тынчсыздануудабыз. Жакын жерде бетон заводу жайгашкан, балким, анын калдыктары каналга төгүлүп жатат», - деп билдиришти алар кайрылуусунда.
Иссык-Ата райондук мамлекеттик администрациясы да кырдаалды комментарийлеп өттү:
«Маалымат алынгандан кийин, Узун-Кыр айыл өкмөтүнүн өкүлдөрү окуя болгон жерге чыгып текшерүү жүргүзүштү. Чынында, жакын жерде бетон ишканасы бар. Заводдун кызматкерлеринин түшүндүрмөсүнө караганда, миксерлерди жууган соң калган бетон калдыктары сууга түшүп, анын түсүн өзгөртөт. Биз облустук жана райондук экология кызматтары менен активдүү иштеп жатабыз. Текшерүү аяктагандан кийин зарыл чаралар көрүлөт», - деп айтылат расмий билдирүүдө.
