Мээркан айылында, Ош шаарында, 2-декабрда «Мээр» аттуу жаңы бала бакчанын ачылышы болду. Мекеме капиталдык ремонттон өтүп, балдарды кабыл алууга даяр.
Ачылыш аземине шаар башчысы Женишбек Токторбаев, шаардык кеңештин төрагасынын орун басары Ниязбек Нурбаев жана жергиликтүү тургундар катышты.
Мурда бул имарат Ч. Тулобердиев атындагы № 34 мектептин филиалы катары колдонулган. Мектеп жаңы имаратка көчкөндөн кийин бошогон жай бала бакчага кайра профилирленди. Жаңы мекеме 100 баланы жайгаштыра алат жана төрт топтон турат, заманбап талаптарга жооп берет.
«Бала бакчада бардык бөлмөлөр жана ички санитардык түйүндөр оңдолгон. Аймакта кошумча туалеттер жана жуугуч жай, ошондой эле жаңы толук жабдылган ашкана курулган. Мекеме керектүү мебель менен камсыздалган», - деп билдирет мэрия. ```
