Нарын шаарында катуу үй-бүлөлүк таштандыны сорттоо боюнча биринчи ишкана ачылды, деп билдирди жергиликтүү мэриянын басма сөз кызматы.
Бул заманбап сорттоо жабдуулары таштанды полигонунун жанында жайгашкан жана жети түрдөгү таштандыны иштетүүгө мүмкүнчүлүк берет. Ишкана саатына 4 тонна таштандыны кайра иштетет жана 20 жаңы жумуш ордун камсыздайт.
Проект «Эко ресурс технология» ЖЧКсы жана НУРП менен кызматташтыкта 9 миллион сомдук инвестиция менен ишке ашырылды. Ал шаардагы санитардык тазалык системасын жакшыртууга жана таштандыны кайра иштетүү практикаларын киргизүүгө багытталган.
Ачылыш учурунда Нарын облусундагы президенттин ыйгарым укуктуу өкүлү Нурбек Сатаров, Нарын шаарынын мэри Жайнак Немат уулу жана долбоорго финансылык колдоо көрсөткөн Ага Хан Фондунын жетекчилиги менен ишкананы кеңейтүү мүмкүнчүлүктөрү талкууланды.
Мэриянын маалыматы боюнча, жаңы сорттоо борбору экологиялык абалды жакшыртууга жана региондогу таштандыны башкаруу системасын туруктуу кылууга негизги кадам болуп калат. ```
