Фундаменттин салынуусуна арналган аземде Кыргыз Республикасынын саламаттыкты сактоо министри Эркин Чечейбаев, Кыргыз Республикасынын президентинин Нарын облусундагы ыйгарым укуктуу өкүлү Нурбек Сатаров, Нарын шаарынын мэри Жайнак Немат уулу, «Ас-Сафа» коомдук бирикмесинин аткаруучу директору Ибрагим Мальсагов жана Нарын районунун акими Нуридин Мадимаров катышты.
Саламаттыкты сактоо министри Эркин Чечейбаев өз сөзүндө баштапкы медициналык-санитардык жардамды мамлекеттик саясаттын негизги багыттарынын бири катары өнүктүрүүнүн маанилүүлүгүн белгиледи. Ал: «Нарын шаарында жаңы үй-бүлөлүк медицина борборунун ачылышы региондун инфраструктурасын жакшыртууда жана калк үчүн медициналык кызматтардын жеткиликтүүлүгүн жогорулатууда маанилүү этап болот. Биз дарыгерлер жана бейтаптар үчүн шарттарды жакшыртуу боюнча демилгелерди ишке ашырууда жардам берген бардык өнөктөштөргө жана кайрымдуулук уюмдарына ыраазычылык билдиребиз» деди.
1968-жылы курулган учурдагы үй-бүлөлүк медицина борбору көп жылдар бою шаар жана район тургундарына медициналык кызмат көрсөтүп келди. Бирок, учурдагы шарттар жетишсиз болуп, баштапкы медициналык-санитардык жардамдын заманбап сапат стандарттарына жооп бербейт.
Бул боюнча Саламаттыкты сактоо министрлиги жана Кыргыз Республикасынын президентинин Нарын облусундагы ыйгарым укуктуу өкүлү «Ас-Сафа» кайрымдуулук фонду менен сүйлөшүүлөрдү өткөрүштү, бул жаңы заманбап медициналык комплекстин куруу боюнча келишимдин кол коюлушуна алып келди.
Маалымат:
Нарын облустук үй-бүлөлүк медицина борбору Нарын шаарынын жана Нарын районунун калкын тейлейт, анын саны 91 533 адамды түзөт.
Алардын ичинде 14 жашка чейинки 28 711 бала бар, анын ичинде 5 жашка чейинки 8 623 бала жана 1 056 жаңы төрөлгөн бала бар.
Аялдардын жалпы саны 46 112 адам, алардын ичинен 18 637 (40,4%) репродуктивдик курагында.
2025-жылдын биринчи тогуз айында борбордо 101 654 амбулатордук кабыл алуу өткөрүлгөн.
