Жакында Кыргызстандын соттук-эксперттик кызматында Япониядан келген делегация болду. Анын курамына Япониянын Юстиция министрлигинин укуктук маселелер боюнча илимий-изилдөө институтунун эл аралык кызматташтык бөлүмүнүн профессору жана прокурору Оку Даики жана ошол эле институттун башкы эксперти Такахаши Шого кирди.
Бул визит эки өлкөнүн юстиция министрликтеринин ортосундагы кызматташтык программасынын бир бөлүгү болуп, "Япония жана Кыргыз Республикасындагы укук системалары боюнча экинчи биргелешкен изилдөө" даярдоого багытталган, деп билдирет Юстиция министрлиги.
Жолугушууда негизги көңүл соттук экспертиза тармагындагы кызматташтыкты илгерилетүүгө, тажрыйба алмашууга, заманбап технологияларды киргизүүгө жана кызматкерлердин кесиптик квалификациясын жогорулатууга бөлүндү.
Соттук-эксперттик кызматтын төрагасы Талантбек Кожонов эл аралык кызматташтыкты тереңдетүү алардын мекемесинин ишинин негизги багыттарынын бири экенин белгиледи.
Өз кезегинде, Оку Даики япон тараптын биргелешкен изилдөөлөрдү жана артыкчылыктуу тармактарда практикалык долбоорлорду иштеп чыгууга даяр экенин билдирди.
Расмий визит программасынын аяктоосунан кийин япон коноктор соттук-эксперттик кызматтын бөлүмдөрүнүн иши менен таанышып, жүргүзүлгөн изилдөөлөрдүн ар түрдүүлүгүн жана эксперттик кызматтардын потенциалын көрүү мүмкүнчүлүгүнө ээ болушту.
