Бул маалыматты "Ынтымак" фракциясынын депутаты Азамат Тургунбаев 23-декабрда өткөн Ош шаардык кеңешинин сессиясында билдирди.
Тургунбаев өзүнүн сөзүндө Манас-Ата айыл аймагында курулушка байланыштуу маселелерди да козгоду.
Анын айтымында, "Капитал" ресторанынын жанында мыйзамсыз курулуштар жайгашкан, алардын көйгөйлөрү азыркыга чейин чечилген жок.
“Ресторандын жанында мурдагы вице-мэрдин гостиницасы жайгашкан, жана анда дагы "кыздар" иштөөдө”, - деди ал.
Курулуш боюнча мэрдин орун басары Мирлан Казыбай уулу "Капитал" ресторанынын мамлекеттик актысы бар экенин, бирок анын артындагы ашкана мыйзамсыз 5–6 метрге кеңейгенин тактады.
Ал бул боюнча сотко кайрылышканын, ишти утуп алышканын жана зарыл чараларды көрүшөөрүн кошумчалады.
Учурдагы сессияда "Ош шаардык мэриясынын муниципалдык аймактык жана айылдык башкармалыктарынын иши" маселеси талкууланууда.
Ошондой эле "Милдет" фракциясынын депутаты Жазгүл Максутова Ошто курулчу балдар оюн аянтчаларынын саны тууралуу кызыкты.
Мэриянын уюштуруу-инспектордук иши жана жергиликтүү өз алдынча башкаруу бөлүмүнүн начальниги Жумамидин Сулайманкулов башында 200дөн ашык аянтча куруу пландалганын, бирок акырында реалдуу муктаждыктарды эске алып, болгону 60 аянтча курулганын билдирди.
