Ал интернетте кыргыз тилин колдонуу маселеси акыркы убакта активдүү талкууланып жатканын белгиледи. Жарандардын бири торт сатылган дүкөндө кыргыз тилинде кызмат көрсөтүүнү талап кылып кайрылган. Натыйжада, ал соттун чечими менен тогуз айдан бери үй камагында жатат. "Мындай талап кылуу — бул кылмышпы?" — деп сурады депутат.
Умуткан Конкубаева депутаттын сөздөрүнө гана таянып, аракеттердин мыйзамдуулугун баалоо туура эместигин айтты.
Ал кошумчалады: "Мен да социалдык тармактарда жана ЖМКларда бул талкууну көргөм. Толук корутунду берүү үчүн, эки тараптын кызыкчылыктарын эске алып, иштин бардык материалдарын изилдөө зарыл. Биз кылмыштын курамы бар же жок экендиги тууралуу кеңири анализ жасабай туруп, эч нерсени тактай албайбыз."
Парламент мүчөсү өткөн жылы мамлекеттик тил жөнүндө мыйзам кабыл алынганын эске салып, президент Садыр Жапаровдун БУУ трибунасында кыргыз тилинде сүйлөгөнүн, Камчыбек Ташиевдин инвесторлорду кыргыз тилинде сүйлөшүүгө чакырганын белгиледи.
"Мен адамдарды кыргыз тилинде кызмат көрсөтүүнү талап кылышкандыгы үчүн сотко тартуу туура эмес деп эсептейм. Мен кызмат көрсөтүү тармагында иштеген ишкерлерди кыргыз тилин сыйлап, анын өнүгүшүнө өз салымдарын кошууга чакырам. Эгер алар Кыргызстанда жашашса, анда анын тилине сый-урмат менен мамиле кылышы керек," — деп баса белгиледи депутат.
