15-январда Ошто, Бабур атындагы Мамлекеттик өзбек академиялык музыкалык-драматургия театрында «Агро Караван - 2026» ярмаркасы өттү.
Облус боюнча өкүлчүлүктөн алынган маалыматка ылайык, бул иш-чара айыл чарба секторун колдоо жана фермерлердин кесиптик жөндөмдөрүн жогорулатуу максатында уюштурулган. Иш-чара «Фергана өрөөнүндө сугат боюнча өнөктөштүк» (FVIPP) долбоорунун алкагында ишке ашырылды.
Ярмарканын катышуучуларынын арасында Ош облусунун биринчи орун басары Илияз Ташбаев, Борбордук Азиядагы Helvetas уюмунун регионалдык директору Эндрю Уилсон, ошондой эле көптөгөн фермерлер жана ишкерлер болду.
Иш-чарада сүйлөгөн Илияз Ташбаев, ярмарка көргөзмө өткөрүү мүмкүнчүлүгүн гана эмес, ошондой эле тажрыйба алмашуу, тереңдетилген билим алуу жана айыл чарбасын өнүктүрүү үчүн жаңы мүмкүнчүлүктөрдү ачуу платформасы экенин белгиледи. Ал «Агро Караван - 2026» долбоорунун негизги максаты фермерлерди заманбап сугат технологиялары менен тааныштыруу, жеткиликтүү финансылык продуктулар тууралуу маалымат берүү, ошондой эле өндүрүүчүлөр, финансылык мекемелер, консультанттар жана компаниялар ортосунда түз байланыштарды орнотууга жардам берүү экенин баса белгиледи.
Алдын ала маалыматтарга караганда, 2025-жылдын аягына чейин региондо 400 гектардан ашык заманбап сугат системалары киргизилген, ал эми 2026-жылга чейин бул көрсөткүчтү 600 гектарга чейин жогорулатуу пландалууда.
