Кыргызстанда 2026-жылы республикалык бюджеттин каражаттарын колдонуп, 5 270 гектар аянтка тамчы жана жаан сугаруу системалары киргизилет. Бул тууралуу Суу ресурстары, айыл чарба жана кайра иштетүү өнөр жайы министрлиги маалымдады.
Маалыматка ылайык, 2024 жана 2025-жылдары суу үнөмдөө технологиялары 2 369,5 гектар аянтты камтыган. Аталган аянттын 641,5 гектары тамчы сугарууга, 1 728 гектары жаан сугарууга бөлүнгөн.
Бул иш-чаралар 2025-жылдын 16-октябрында министрликтин суу үнөмдөө технологияларын киргизүү боюнча чыгарган буйругуна ылайык жүргүзүлүүдө. Документте мамлекеттик фонддун жерлеринде заманбап сугаруу системаларын орнотуу боюнча чаралар каралган жана алардын убактылуу пайдаланылышы үчүн участкалар белгиленген.
Учурда өлкөдө болжол менен 2 000 гектар жер белгиленген жана 1 500 гектарда сугаруу системаларын орнотуу боюнча тендерлер өткөрүлгөн. Ошондой эле долбоордук-сметалык документация даярдалган. Фермерлер менен суу үнөмдөө технологияларынын артыкчылыктары боюнча активдүү түшүндүрүү иштери жүргүзүлүүдө. Республика деңгээлинде маалымдуулукту жогорулатуу үчүн эки семинар өткөрүлгөн.
Тендердик процедуралар аяктагандан кийин сугаруу системаларын орнотуу үчүн керектүү жабдууларды сатып алуу пландалууда. Монтаж 2026-жылдын вегетациялык мезгилин башталгандан мурда аяктайт деп күтүлүүдө.
