Берилген маалыматка ылайык, 2024-2025-жылдары республика аймагында жалпы аянты 2 369,5 гектарды түзгөн суу үнөмдөө системалары орнотулат. Бул аянттын 641,5 гектарында тамчы сугаруу, ал эми жаан сугаруу 1 728 гектарды камтыйт.
Бул технологияларды киргизүү боюнча иштер 16-октябрда министр тарабынан чыгарылган буйрукка ылайык жүргүзүлүүдө. "Суу үнөмдөө технологияларын киргизүү жөнүндө" аталыштагы документ мамлекеттик фонддун жерлеринде заманбап сугаруу системаларын орнотууну, ошондой эле алардын убактылуу пайдаланылышы үчүн участкаларды аныктоону камтыйт.
Учурда республикада 2 000 гектар жер белгиленген жана 1 500 гектарда системаларды орнотуу боюнча тендерлер жарыяланган. Проекттик-сметалык документация даяр. Мындан тышкары, фермерлер арасында суу үнөмдөө технологияларынын артыкчылыктарын түшүндүрүүгө багытталган маалыматтык иш-чаралар өткөрүлүүдө, ал эми республикалык деңгээлде эки семинар өткөрүлгөн.
Тендердик процедуралар аяктагандан кийин зарыл болгон жабдуулар сатып алынат, ал эми системаларды орнотуу 2026-жылдын вегетациялык сезону башталгандан мурда жүргүзүлөт.
