Бишкек мэри шаардагы жаңы аймактардын тургундары менен жолугушуу өткөрдү
Бишкек мэри Айбек Джунушалиевдин борборго жаңы кошулган райондордун тургундары менен ачык жолугушуусу Ак-Бата турак жай массивиндеги №43 орто мектепте өттү. Бул тууралуу маалыматты мэриянын басма сөз кызматы билдирди.
Иш-чарага МТФ-2, Нур-Кожо, Ак-Бата, Ак-Жар, Лебединовка, Аламудун, Төмөнкү Ала-Арча жана 305-МАБ сыяктуу турак жай массивдеринин тургундары катышты.
Суу менен камсыздоо, канализация, жолдордун абалы жана коомдук транспорттун жетишсиздиги сыяктуу маанилүү маселелер талкууланды. Транспорт департаментинин башчысы Уланбек Бейшенбаев 8 метр узундуктагы автобустар жол инфраструктурасы оңдолгондон кийин гана ишке киргизилээрин билдирди.
Басма сөз кызматынын маалыматына ылайык, мэр суу менен камсыздоо жана канализация маселелери чечилмейинче, жолдорду оңдоо иштери жүргүзүлбөй турганын белгиледи. Ошондой эле Президенттин тапшырмасы менен 2030-жылга чейин жаңы райондорду өнүктүрүү программасы тууралуу маалыматты жарыялады. Программанын жалпы баасы болжол менен 9 миллиард сомду түзөт, анын ичинен 2025-жылы 2,5-3 миллиард сом бөлүнгөн.
Мындан тышкары, жер тилкелери боюнча маселелер көтөрүлдү. Айбек Джунушалиев жолдорду куруу процессинде мыйзамсыз орнотулган чарба объектилери жана жаңы фундаменттер алынып салынаарын билдирди, бирок мурда аныкталган мыйзамсыз турак үйлөр бузулбайт, деп маалымдады басма сөз кызматы.
Басма сөз кызматынын сүрөтү
