Жыйында өкмөт башчысынын орун басары — суу ресурстары, айыл чарба жана кайра иштетүү өнөр жайы министри Бакыт Торобаев, Жалал-Абад облусундагы президенттин ыйгарым укуктуу өкүлү Тилек Текебаев, райондордун жана шаарлардын башчылары, ошондой эле облустук, райондук жана шаардык мекемелердин жана ишканалардын жетекчилери катышты.
Коллегиянын жүрүшүндө облустун социалдык-экономикалык өнүгүүсүнүн негизги көрсөткүчтөрү талданып, жетишилген жыйынтыктар каралды.
Өткөн жылдын жыйынтыгы боюнча өнөр жай продукциясынын физикалык көлөмүнүн индекси 125,8 пайызды түздү, айыл чарбасынын өсүү темпи 105,3 пайызды, негизги капиталга болгон инвестициялар 140,3 пайызды түздү. Жалпы 58 миллиард 845 миллион сомдук өнөр жай продукциясы өндүрүлдү, облустун республикадагы үлүшү 7,4 пайызга жетти. Жыл ичинде 15 ири өндүрүш объектиси пайдаланууга берилди жана 7 миллиард сомдон ашык инвестиция тартылды.
Айыл чарба секторунда 88 миллиард 880,8 миллион сомдук продукция өндүрүлдү, облустун республикадагы үлүшү 19,3 пайызды түздү. Мамлекеттик бюджеттин кирешеси 105,6 пайызга аткарылып, 27 миллиард 806 миллион сомго жетти.
Социалдык тармакта жыл ичинде 52 объект пайдаланууга берилди, анын ичинде 24 бала бакча, 22 мектеп жана 15 спорт объектиси. Жалал-Абад мамлекеттик университетинин медициналык факультетинде 50 бюджеттик орун ачылды.
Өткөн жылы облусунда 26 миң 667 наристе төрөлдү, 1 жашка чейинки балдардын 301 өлүм учурлары катталды. Өткөн жыл менен салыштырганда көрсөткүч 41 учурга төмөндөгөн.
«Менин үйүм» мамлекеттик турак жай программасынын алкагында 2025-жылы 2 865 батир пайдаланууга берилди.
«Социалдык контракт» долбоору боюнча 4207 үй-бүлөгө 150 миң сом өлчөмүндө финансылык жардам көрсөтүлдү. Туризм тармагында облуска келген туристтердин саны 353 миңден ашты, жергиликтүү бюджетке 288 миллион сомдон ашык каражат түштү.
Коллегиянын жыйынтыгы боюнча облустун башчысы райондордун, шаарлардын жана облустук мекемелердин жетекчилерине 2026-жылга бир катар тапшырмаларды койду. Алар экономикалык өсүүнү камсыз кылууга, инвестицияларды тартууга, социалдык инфраструктураны өнүктүрүүгө жана калктын жашоо сапатын жакшыртууга багытталган. Ошондой эле билим берүү жана медициналык кызмат көрсөтүүлөрдүн сапатын жакшыртууга, жазгы талаа иштерине даярдык көрүүгө жана суу ресурстарын натыйжалуу пайдаланууга көңүл бурулду.
Коллегияда кабыл алынган чечимдердин аткарылышы көзөмөлгө алынды, тиешелүү чаралар көрүлөрү белгиленди.
