Араван районундагы «Бирлик» айыл чарба ишканасы заманбап технологияларды колдонуп картошка отургузууну баштады. Бул тууралуу Айыл чарба министрлиги билдирет.
Министрликтин маалыматы боюнча, жаңы техника беш операцияны бир убакта жүргүзүүгө мүмкүнчүлүк берет, бул фермерлердин эмгегин жеңилдетип, талаа иштерин эффективдүү аткарууга шарт түзөт.
Бул техниканын негизги өзгөчөлүктөрү:
- чөптөр менен күрөшүү үчүн гербициддерди колдонуу, бул түшүмдүн сапатын жакшыртууга жардам берет;
- картошканы 90 см аралыкта жана бир нече катар менен отургузуу мүмкүнчүлүгү, бул иштердин жалпы эффективдүүлүгүн жогорулатат;
- суу ресурстарын үнөмдөө үчүн тамчы суу берүү системасын орнотуу;
- жердин уруктуулугун жакшыртуу үчүн атайын жабдык аркылуу жер семирткичтерди таратуу;
- топуракты коргоо жана нымдуулукту сактоо үчүн полиэтилен пленкаларын колдонуу.
Министрликте жаңы техника өзүнүн эффективдүүлүгүн көрсөтсө, кийинки жылы технологиялар башка фермерлерге да сунушталары белгиленди.
Ошондой эле «Бирлик» ишканасы айыл чарба өндүрүшүн өнүктүрүүгө, заманбап технологияларды киргизүүгө жана жергиликтүү фермерлердин жумушун жеңилдетүүгө багытталганын, бул өлкөнүн агрардык секторунун эффективдүүлүгүн жогорулатууга жардам берет деп баса белгиленди.
