Иш-чарада Кыргыз Республикасынын башкы прокурору Максат Асаналиев, ошондой эле жергиликтүү мамлекеттик органдардын жетекчилери, прокуратура кызматкерлери жана кызмат өтөгөн ардагерлер катышты.
Максат Асаналиев өз сөзүндө жаңы имарат прокуратуранын ишин кыйла жакшыртып, жарандардын кайрылууларына тезирээк жооп берүүгө мүмкүндүк берет деп белгиледи.
Мындан тышкары, ал региондордо укук коргоо системасын бекемдөө боюнча мамлекеттик программа алкагында жаңы административдик имараттар жана прокуратура кызматкерлерине кызматтык турак жайлар куруу улантылып жатканын айтты.
Курулган имарат заманбап стандарттарга жооп берет жана кызматтык милдеттерди натыйжалуу аткаруу үчүн бардык керектүү жабдуулар менен камсыздалган, бул мыйзамдуулукту камсыз кылууга жана жарандардын укуктарын коргоого жардам берет.
