Таласта эл аралык стандарттарга жооп берген стадион курулууда. Бул тууралуу Кыргыз футбол бирикмесинин билдирүүсүндө айтылган.
Иш сапарынын алкагында, КФБнын вице-президенти Дастанбек Конокбаев, башкы катчы Медербек Сыдыков жана КФБнын президентинин кеңешчиси Аман Каскеримов Таласка барып, 5000 орундуу жаңы стадиондун курулушунун жүрүшү менен таанышышты.
Сапар учурунда КФБнын жетекчилиги жүргүзүлүп жаткан иштердин сапатына көңүл буруп, объекттин эл аралык талаптарга жана футбол инфраструктурасынын стандарттарына жооп берүүсүнүн маанилүүлүгүн белгилешти.
Мындан тышкары, КФБнын өкүлдөрү Таластагы №6 мектептин аймагында жайгашкан футбол аянтын карап, анын учурдагы абалын баалашты.
Стадион курулушунун башталышын символдоштурган капсула 2025-жылдын 9-апрелинде коюлганын эске салабыз. Курулуш аяктагандан кийин Талас облусунда эл аралык футбол оюндары өткөрүлүү мүмкүнчүлүгү пайда болот.
Бул стадион Таласты өкүлчүлүк кылган «Азия» футбол клубунун негизги үй аянты болуп калат.
