Кечээ Кыргыз Республикасынын Билим берүү министрлигинде Догдуркул Кендирбаева жана Австриядан келген делегациянын катышуусунда жолугушуу өттү.
Ведомствонун билдирүүсүнө караганда, австрия делегациясынын курамына Федералдык финансылык министрлигинин, билим берүү мекемелеринин өкүлдөрү жана Австриянын экономикалык кызматташтык жана өнүктүрүү агенттигинин дипломатиялык маселелер боюнча кеңешчиси кирген.
Жолугушуунун жүрүшүндө катышуучулар кесиптик, техникалык жана туристтик билим берүү тармагында кызматташтыкты кеңейтүү мүмкүнчүлүктөрүн талкуулашты. Айрыкча, Леобен университети жана «Klessheim» туристтик колледжи менен өз ара аракеттенүү маселеси көтөрүлдү. Австрия тарап окуу программаларын түзүүгө, квалификациялуу адистерди тартууга жана мейманкана менеджменти жана туризм боюнча лекциялар өткөрүүгө жардам берүүгө даяр экенин билдирди.
Догдуркул Кендирбаева Кыргызстан үчүн тоолуу ландшафтка ээ болгондуктан, туристтик тармакты эл аралык стандарттарга ылайык өнүктүрүү өтө маанилүү милдет экенин белгиледи.
Жолугушуунун жыйынтыгында Кыргыз Республикасынын Билим берүү министрлиги менен Австриянын экономикалык кызматташтык жана өнүктүрүү агенттиги ортосунда биргелешкен жумушчу топ түзүү боюнча меморандумга кол коюлду. ```
