Келип түшкөн окуу китептеринин жалпы көлөмү 651 миң дананы түзөт. Китептер Россияда басылып, Кыргызстанга пайдалануу үчүн жеткирилди.
Учурда окуу китептери складдарга бөлүштүрүлүүдө, жана жакынкы күндөрдө алар Кыргызстан боюнча билим берүү мекемелерине жөнөтүлөт.
Бул окуу китептери кыргыз жана орус тилдеринде билим берүү жүргүзүлгөн мектептерге арналган жана төмөнкү предметтерди камтыйт:
● «Орус тили жана окуу»;
● «Орус тили»;
● «Орус адабияты»;
● «Орус жана дүйнөлүк адабият».
Окуу китептеринин адаптациясы 1, 2, 5 жана 7-класстарга тиешелүү болуп, бардык материалдар зарыл стандарттарга ылайык квалификациялуу адистер тарабынан экспертизадан өттү.
11-ноябрда Бишкекте өткөн өкмөттөр аралык комиссиянын жыйынында Россия өкмөтүнүн орун басары Алексей Оверчук окуу китептеринин сертификатын Кыргызстандын өкмөт башчысы Адылбек Касымалиевге тапшырды.
Учурда 3, 4, 6, 8 жана 9-класстар үчүн ошол эле предметтер боюнча окуу китептерин адаптациялоо боюнча иштер да жүрүп жатат.
Бул окуу китептери Кыргыз Республикасынын Билим берүү министрлиги, Россия Федерациясынын Билим берүү министрлиги, «Окуу китеби» басмаканасы жана Россия Федерациясынан «Просвещение» акционердик коомунун ортосундагы меморандумдун алкагында чыгарылган.
