15 жана 16-ноябрда Бишкекте, Баткенде, Жалал-Абадда, Караколдо жана Ошто жыл сайынгы расмий эмес жаштар [не]конференциясы JashtarCamp-2014 өтөт. Бул тууралуу иш-чаранын уюштуруучулары Жаштардын өнүгүү институту, Ош жаштары жана Forward коомдук бирикмелери билдиришти.
JashtarCamp-2014 Кыргыз Республикасынын Эмгек, миграция жана жаштар министрлигинин, "Сорос - Кыргызстан" фондунун жаштар программасынын, Германиянын эл аралык кызматташтык боюнча коомунун (GIZ) жаштар программасынын жана ЮНИСЕФтин Кыргыз Республикасындагы Балдар фондунун колдоосу менен өткөрүлөт. Бул иш-чара Кыргыз Республикасында 2015-жылга чейин жаштар саясатын ишке ашыруу боюнча мамлекеттик стратегиянын алкагында уюштурулууда.
Бул жылы иш-чара төрт тематикалык аянтчаны камтыйт: "Жаштар - илим, маданият жана чыгармачылык", "Жаштар - саясат жана бизнес", "Жаштар - жарандык катышуу (экология, ден-соолук, гендердик теңдик)", "Жаштар - Кыргызстандын Балдар укуктары боюнча БУУнун Конвенциясын ратификациялаганына 20 жыл".
Кыргызстан тарабынан БУУнун Балдар укуктары боюнча Конвенциясын ратификациялоонун юбилейин белгилөө жана балдардын укуктары боюнча маалыматты таратуу максатында, уюштуруучулар 13-18 жаштагы мектеп окуучулары жана студенттер арасында "Менин укугум бар..." темасында эң жакшы сүрөт үчүн конкурс жарыялашты.
Мындан тышкары, жаштарды Кыргызстандын өнүгүшүнө тартуу максатында "Мен өзүмдүн айланамды өзгөртөм!" социалдык роликтер конкурсу өткөрүлөт.
Конкурстардын жеңүүчүлөрү Бишкекте, Баткенде, Жалал-Абадда, Ошто жана Караколдо JashtarCamp-2014 жабылышында дипломдор жана сыйлыктар менен сыйланат. Иш-чарага катышуу шарттары жөнүндө толук маалыматты www.jashtarcamp.org расмий сайтынан таба аласыз.
Социалдык роликтер жана сүрөттөр 2014-жылдын 14-октябрына чейин 7-ноябрга чейин Кыргызстандын бардык региондорунан катышуучулардан кабыл алынат. Конкурс иштерин [email protected] электрондук почтасына жөнөтсөңүз же Бишкек ш., Коенкозова көчөсү, 17 (Исанов көчөсүнүн кесилишинде) дарегине алып келип берсеңиз болот.
Маалымат
Биринчи JashtarCamp 2009-жылдын 10-ноябрында Бишкекте Дүйнөлүк жаштар күнүндө өттү. JashtarCampка 4 жылдын ичинде Кыргызстандын жарандык активдүү жана чыгармачыл жаштарынан 6500дөн ашык өкүл катышты.
Бишкек ш., Коенкозова көчөсү, 17 (Исанов көчөсүнүн кесилишинде)
