Кытай университеттеринде кыргыз тили жана маданияты окулмакчы
Окуу жайларынын жетекчилери «2+2» схемасы боюнча эки дипломдун долбоорун ишке ашыруу боюнча макулдашышты
Кыргызстандын борборунда Бишкек гуманитардык университетинин ректору профессор Абдылда Мусаевдин Пекиндин Улуттук азчылыктар борбордук университетинин ректори Хуан Тайянь баштаган делегациясы менен жолугушуусу өттү. Окуу жайларынын жетекчилери «2+2» схемасы боюнча эки дипломдун долбоорун ишке ашыруу боюнча макулдашышты, бул учурда студенттер 2 жыл БГУда, 2 жыл Пекиндин Улуттук азчылыктар борбордук университетинде билим алышат.
БГУда мындай эл аралык долбоорлор боюнча кадрларды даярдоо боюнча тажрыйба бар. Мисалы, 2017-жылы Кытай Эл Республикасынын өкмөтүнүн долбоору боюнча БГУда биринчи бүтүрүүчүлөр чыкты. Мындан тышкары, окуу жайларынын ректорлору Пекиндин Улуттук азчылыктар борбордук университетинде кыргыз тили жана маданияты борборун ачуу маселесин талкуулашты.
– Пекиндин Улуттук азчылыктар борбордук университетинде кыргыз тилин окутуу бул багытта кызматташтыктын туруктуу өнүгүүсүн жана Кыргызстандын Кытай тилине жана адабиятына, Кытайда болсо кыргыз тилине, маданиятына, салттарына жана адаттарына болгон кызыгуунун өсүшүн көрсөтөт. Бүгүнкү күндө Пекиндин Улуттук азчылыктар борбордук университетинин ректори мырза Хуан Тайяньдын визити билим берүү жана илим тармагында өз ара аракеттешүүнү активдештирүүгө кызмат кылат жана биздин университеттер арасындагы кызматташтыкты жана өнөктөштүктү кеңейтүүгө көмөктөшөт деп ишенем, – деди Абдылда Мусаев.
Өз кезегинде, Хуан Тайянь Пекиндин Улуттук азчылыктар борбордук университетинин негизги максаты – дүйнөлүк деңгээлдеги улуттук университет куруу экенин белгиледи, бул болсо өнөктөш университеттердин кызыкчылыктарына толук жооп берет. Мурда Пекин чет тилдер университетинин базасында «Кыргызстан» маданий борборун ачуу боюнча макулдашууга жетишилген. Мындан тышкары, 2018-19-окуу жылында университетте кыргыз тилин үйрөнүү боюнча топторду ачуу пландалууда.
БГУда ошондой эле Москва мамлекеттик лингвистикалык университетинде 10 жылдан бери ийгиликтүү иштеп келе жаткан кыргыз тили жана маданияты борбору бар экенин белгилеп кетели.
