2010-жылы негизделген кавер-группа «The Rolls Band» «The Beatles», «The Rolling Stones», Элвис Пресли ж.б. ырларын аткарууга адистешкен. Бул музыкалык топтун курамы төмөнкүчө: Улан Оморов – вокал, губная гармоника, Эрсултан Алыкулов – вокал, бас-гитара, Данияр Джуманазаров – вокал, гитара, Дмитрий Соседов – барабандар.
«And I Love Her» треги 1964-жылдын 10-июлунда «A Hard Day’s Night» пластинкасы менен жарыкка чыккан. Ыр Пол Маккартни менен Джон Леннон тарабынан жазылган. Ыр Маккартнинин ошол жылдардагы сүйүктүүсү, актриса Джейн Эшерге арналган. Бул композиция музыкалык хит-парад Billboard'до он экинчи орунга жеткен. «The Beatles» «And I Love Her» ырын студиядан тышкары бир гана жолу – «Би-би-си» телеканалынын «Top Gear» радиошоусунда аткарган.
Эскерте кетсек, 2007-жылы Алматыда «битламдарга» Эдуард Казаряндын авторлугундагы бронзадан жасалган эстелик орнотулган. Пол Маккартни, Джордж Харрисон жана Ринго Старр композицияда туруп сүрөттөлгөн. Джон Леннон болсо отуруп, колунда гитарасы менен сүрөттөлгөн. Кааласаңыз, музыканттын эстелигинин жанына отуруп, анын менен кошо сүрөткө түшүүгө болот. Динамиктерден «The Beatles» ырлары үзгүлтүксүз жаңырып турат. Эстелик туристтердин жана шаардыктардын көпчүлүгүн, «Кок-Тюбе паркы» көңүл ачуу борборун зыярат кылгандарды тартат.
2001-жылдан бери ЮНЕСКОнун чечими менен 16-январь Дүйнөлүк «The Beatles» күнү катары белгиленет. Бул дата бекеринен тандалган эмес. 1957-жылы Ливерпулда «The Cavern» клубу ачылып, анда ошол кезде эч кимге белгилүү эмес жаш музыканттар Джон Леннон, Пол Маккартни жана Джордж Харрисон өз жолдорун башташкан. Бир нече жылдан кийин аларга барабанчы Ринго Старр кошулган.
