Лондондо 1-6 декабрь күндөрү London Mining Week өтүп жатат, ага Кыргызстандын табигый ресурстар, экология жана техникалык көзөмөл министри Медер Машиев катышууда.
Алгачкы күнү ал пленардык сессияда сөз сүйлөп, Борбордук Азиядан келген көптөгөн министрлер менен Кыргызстандын потенциалын жана критикалык минералдар секторуна инвестиция тартуу аракеттерин талкуулады.
Мындан тышкары, министр критикалык маанидеги минералдарга арналган өкмөттүк тегерек столго катышып, Евразиядагы кен казуу жана пайдалы казыналарды изилдөө боюнча XIII конференцияда сөз сүйлөдү. Бул конференциянын алкагында ал Кыргызстандагы критикалык маанидеги минералдар секторунун өнүгүү стратегиясын сунуштады.
Сөз сүйлөө учурунда Машиев Кыргызстан Борбордук Азияда тез өнүгүп жаткан экономика экенин, кен казуу тармагына инвестиция тартуу үчүн жаңы мүмкүнчүлүктөрдү ачып жатканын баса белгиледи. Ал ошондой эле Кыргызстан эл аралык инвесторлор үчүн эмне үчүн кызыктуу өнөктөш экенин түшүндүрдү.
Ал критикалык минералдардын бар экендигин жана геологиялык изилдөөгө ылайыктуу жерлерди белгилеп, 90% дан ашык энергия гидроэлектр станциялары тарабынан өндүрүлгөн, бул кен казуунун углерод изин азайтып, эл аралык ESG талаптарына жооп берерин айтты. Ошондой эле министр укуктук жана инвестициялык чөйрөнү жакшыртуу боюнча олуттуу жетишкендиктер жөнүндө маалымдады.
Бүгүнкү күнү Кыргызстандын министрлер кабинетинин жана Улуу Британия менен Түндүк Ирландия өкмөтүнүн ортосунда критикалык маанидеги минералдар боюнча өз ара түшүнүшүү меморандумун кол коюу күтүлүүдө. ```
