Кыргыз Республикасынын Улуттук банкы улуттук валютаны колдоо үчүн бардык зарыл чараларды көрүүдө. Мамлекетте чет өлкөлүк валютанын жетишсиздиги жок. Бул тууралуу маалымат жыйынында борбордук банктын орун басары Нурбек Жениш билдирди.
Ал 2023-жылдын сентябрь айынан баштап АКШ долларынын сомго карата алмашуу курсу 5,87% га жогорулаганын, 1-сентябрда 52,9561 сомдон 23-октябрда 56,0660 сомго жеткенин айтты. "2014-жылдын январь айынан 23-октябрга чейин АКШ долларынын алмашуу курсу 13,98% га өскөн. Улуттук валютанын күчсүздүгү бир нече тышкы факторлордун таасири менен байланыштуу. Жыл башында доллардын курсунун өсүшү Украинадагы кризис фонунда Россиядагы тышкы саясий кырдаалдын начарлашы, Казакстандагы тенгенин бир заматта девальвациясы жана АКШнын ФРСинин саясаты менен байланышкан. Азыркы өсүш Европа жана Кыргызстандын соода өнөктөштөрүнүн экономикалык абалы, Россияга каршы санкциялар, сезондук фактор менен байланыштуу", - деп түшүндүрдү орун басар.
"Доллардын күчтөнүшү глобалдык мүнөзгө ээ. Учурда эл аралык финансылык рыноктордо АКШ долларынын башка өлкөлөрдүн валюталарына карата позицияларынын күчөшү байкалууда. Мисалы, жыл башынан бери орус рубли 25,44% га, казак тенгеси 17,48% га, евро 7,50% га, швейцар франкы 5,56% га, түрк лирасы 4,61% га күчсүздүккө учурады", - деп баса белгиледи Н. Жениш.
Улуттук банк 2023-жылдын башынан бери 309,293 млн. долларлык валюталык интервенцияларды жүргүздү. Ошондой эле 19-августтан 22-октябрга чейин регулятор чет өлкөлүк валютаны 117,28 млн. долларга сатуу операцияларын жүргүздү. Учурдагы эл аралык резервдердин көлөмү $2,1 млрд, бул өлкөгө кирген төрт айлык импорттун көлөмүнө туура келет.
Улуттук банктын орун басары тарабынан берилген маалыматтан кийин, ЖМК өкүлдөрүнө кызыктырган бардык суроолорду берүү мүмкүнчүлүгү берилди. Айрыкча, АКШ валютасынын курсу өсүшү менен инфляциянын болжолун, валюталык рыноктогу абалды стабилдештирүү үчүн НБКР тарабынан кабыл алынган чараларды, мигранттардан түшкөн каражаттардын динамикасын ж.б. темалар көтөрүлдү.
Маалымат жыйынына НБКРдин экономикалык башкармалыгынын начальниги Сейилбек Урустемов жана НБКРдин акча-кредит операциялары башкармалыгынын начальниги Раушан Сейткасымова да катышты.
