Кыргыз Республикасынын Улуттук банкынын орун басары Бактыгуль Жеенбаева улуу акын, композитор жана комузчу Токтогул Сатылгановдун небереси Молдожан Токтогулов менен жолугушту.
Жолугушуунун жүрүшүндө Б.Жеенбаева акын-импровизатордун урпагына Улуттук банк тарабынан Т. Сатылгановдун 150 жылдыгына арналган 100 сомдук эстелик банкнотторду тапшырды. «Быйыл Кыргызстан белгилүү кыргыз акынынын 150 жылдык юбилейин белгилеп жатат. Улуттук банк ушул датага карата эстелик банкнотторду чыгарды. Банк жетекчилигинин жана кызматкерлеринин атынан сизге бир нече банкнотту тапшырууга уруксат бериңиз», - деди ал, М.Токтогуловго өткөрүп берип.
Өз кезегинде Молдожан Токтогулов Улуттук банк жетекчилигине эстелик банкнотторду чыгарганы үчүн ыраазычылык билдирди. «Токтогулга 150 жыл» деген жазуусу бар атайын банкноттордун чыгарылганы кубандырат жана жагымдуу, бул кыргыз элинин улуу уулдарынын юбилейин белгилөө үчүн», - деди М.Токтогулов, жооп катары Т. Сатылгановдун «Тандалмалар» чыгармалар жыйнагын тапшырды.
МААЛЫМАТ:
2014-жылдын 20-октябрына карата Кыргыз Республикасынын Улуттук банкы улуу кыргыз акыны, композитору жана комузчусу Токтогул Сатылгановдун 150 жылдыгына арналган 100 сомдук эстелик банкнотту жүгүртүүгө чыгарды.
Банкноттун сүрөттөлүшү:
Ак суу белгилеринин үстүндө Токтогул Сатылгановдун алтын түстөгү профили улуттук орнамент менен чектелип, көк түстөгү эстелик жазуусу «Токтогулга 150 жыл» жазылган. Эстелик жазуу, орнамент жана профиль офсеттик басма техникасы менен жасалган. Банкнота атайын Securicoat™ лак менен капталган. Жашыруун сүрөт Dynamic© түстүү радуга сүрөтү менен жасалган. Тиражы 3000 даана.
