Стамбулда Экономикалык кызматташтык уюмунун (ЭКУ) бешинчи жыйынында Кыргызстан, Иран, Пакистан жана Түркия ортосунда өз ара түшүнүшүү меморандуму кол коюлду. Бул тууралуу Экономика министрлигинин басма сөз кызматы билдирет.
Бул маалыматка ылайык, кол коюлган документтин максаты — бажы процедураларын жеңилдетүү, маалымат алмашууну жакшыртуу жана соодада санариптик технологияларды киргизүү.
Кыргызстандын Түркиядагы соода өкүлү Чынгыз Эсенгул уулу иш-чарада өлкөсүнүн сооданы санариптештирүү, электрондук маалымат алмашууну кеңейтүү, бирдиктүү бажы стандарттарын иштеп чыгуу жана ЭКУ келишимин заманбап талаптарга ылайык жаңылоо боюнча негизги демилгелерин сунуштады.
Мындан тышкары, жыйналыштын катышуучулары ЭКУ келишимин жаңылоо боюнча сүйлөшүүлөрдү жүргүзүү үчүн техникалык комитет түзүү чечимин кабыл алышты. Бул сүйлөшүүлөр 2026-жылдын биринчи кварталында башталат деп күтүлүүдө. Ошондой эле ЭКУ алкагында эркин соода зонасын түзүүгө багытталган жаңы жол картасы бекитилди.
