«Кыргызстандын улуттук электр тармагы» акционердик коому социалдык тармактарда таралган «акылдуу» эсептегичтер тууралуу маалыматты четке каккан билдирүү жасады. Компания жарандарды расмий булактарга гана кайрылууга чакырды.
Жакында тараган ушактарда «акылдуу» эсептегичтер орнотулган кубаттуулукту ашырганда электр энергиясын өчүрүп, абонент кайрадан приборлорду күйгүзүп, эсептегичтеги кнопканы басып электр энергиясын калыбына келтириши керектиги айтылууда.
«НЭС Кыргызстан» акционердик коому орнотулган кубаттуулукту ашырганда электр энергиясынын чындыгында өчүрүлөрүн, бирок жүктөм азайганда эсептегич автоматтык түрдө электр энергиясын калыбына келтирерин түшүндүрүштү. Ошол эле учурда, компаниянын расмий билдирүүсүндө белгиленгендей, эч кандай кошумча төлөмдөр талап кылынбайт.
Ошондой эле электр энергиясын кайрадан күйгүзүү үчүн 170 сом төлөм алынат деген маалымат да четке кагылды.
Компания социалдык тармактардагы текшерилбеген маалыматка ишенбөөнү жана маалыматтарды текшерилген жана расмий булактардан гана алууну катуу сунуштайт.
