Бишкекте Кыргызстан менен Австриянын ортосундагы биргелешкен жумушчу топтун биринчи жыйыны өттү. Бул тууралуу маалымат Цифрдык өнүктүрүү жана инновациялык технологиялар министрлигинен алынды.
Австрия тараптын өкүлү, каржы министринин орун басары Андреас Райххардт делегацияны жетектеди.
Жыйында жасалма интеллект, инновациялык технологиялар, телекоммуникация кызматтарын жөнгө салуу жана маалыматтарды иштетүү борборлорун өнүктүрүү боюнча негизги маселелер талкууланды.
Иш-чаранын алкагында «Тундук» платформасынын презентациясы өтүп, Кыргызстандын мамлекеттик кызматтарды цифрлаштыруу боюнча жетишкендиктери, анын ичинде СМЭВ жана мобилдик тиркеме боюнча иши көрсөтүлдү.
Жыйындын жыйынтыгы менен тараптар биргелешкен пландарды макулдашып, кийинки жыйналыштарды өткөрүү мөөнөттөрүн аныкташты. ```
