International Council of Museums (ICOM) — бул дүйнөлүк уюм, музей адистерин бириктирип, маданий жана табигый мурастарды сактоо, өнүктүрүү жана популяризациялоо боюнча иш алып барат. ICOM 1946-жылы Парижде, Францияда негизделген.
Конференцияга 130дан ашык өлкөдөн музей кызматкерлери чогулду. Иш-чаранын программасында 400дөн ашык доклад, 100дөн көп панелдик талкуулар жана 10 пленардык жыйын, ошондой эле музей жаңылыктарынын эң ири көргөзмөсү болду.
Талкуунун негизги темаларына төмөнкүлөр кирди:
- Социалдык жана демографиялык өзгөрүүлөр;
- Жасалма интеллекттин жана санариптик технологиялардын ролу;
- Маданий мурастарды сактоо;
- Музей чөйрөсүндө инклюзия;
- Музей дипломатиясы;
- Музейлердин коомдук өнүгүүгө таасири.
Жасалма интеллект жана музейлерге арналган сессияда Жылдыз Бакашова музей ишмердүүлүгүндө жаңы технологияларды колдонуу, санарип архивдерди сактоо жана виртуалдык көргөзмөлөрдүн келечеги боюнча өз көз караштарын билдирди.
Форум учурунда ал ошондой эле ICOMдун президенти Эмма Нардимен жана ICOMдун вице-президенти, ICOM ОАЭнин төрагасы Насир Аль Дармаки менен жолугуп, кызматташтыкты кеңейтүү жана инновациялык жана инклюзивдүү музей инициативаларын биргелешип ишке ашыруу мүмкүнчүлүктөрүн талкуулады.
Ведомстводо белгилешкендей, Кыргызстан Улуттук тарых музейи акыркы жылдары ири эл аралык форумдарга катышкан эмес.
