Укук коргоо органдарынын маалыматына ылайык, 28-ноябрда Сузак райондук ички иштер бөлүмүнө Б.А. аттуу жаран кайрылган. Ал Базар-Коргон районунда жашайт. Ал 2025-жылдын жайында жергиликтүү тургун Ы.Б. уулунан 3 миллион сомго «HOWO» маркасындагы жүк ташуучу унааны сатып алганын билдирген. Сатуучу документтерди тез арада кайра каттоого убада берген, бирок сатып алуучуну узак убакыт бою жаңылыштырган.
Текшерүү учурунда бул жүк унаасы Ноокен районунда катталган жол курулуш компаниясына таандык экени аныкталды. Ошентип, жабырлануучу 3 миллион сомдук чыгымга учурады.
Окуя Сузак райондук ички иштер бөлүмүнүн тергөө бөлүмү тарабынан 209-беренеге («Алдамчылык») ылайык Бирдиктүү кылмыштар реестрине катталды жана кылмыш иши козголду.
Облус милициясынын кызматкерлери 29 жаштагы шектүү Ы.Б. уулун Базар-Коргон районунан кармоого жетишти.
Сузак райондук соту бир айга камакка алуу чарасын белгиледи.
Тергөө учурунда шектүү боюнча мыйзамсыз ишмердүүлүктүн кошумча фактылары аныкталды.
Тергөө уланууда.
