Маалыматка ылайык, 2024-жылдын 22-октябрында Кара-Суй районунун милиция бөлүмүнө 1996-жылы туулган жергиликтүү тургун А.Д. кайрылган.
Ал 2024-жылдын 31-январында 1992-жылы туулган К.З. аттуу жаран анын ишенимин жеңип алып, 80 000 долларга 2018-жылы чыгарылган «Cadillac Escalade» үлгүсүндөгү унааны сатып алганын айтты. Бирок, 28 000 долларды төлөбөй, изин жашырып кеткен.
Алдамчылык фактысы катталып, алдын ала текшерүү башталды. Жыйналган материалдар негизинде Кыргыз Республикасынын Кылмыш кодексинин 209-беренеси боюнча кылмыш иши козголуп, оперативдүү-тергөө иштери башталды.
2025-жылдын 18-ноябрында жүргүзүлгөн оперативдүү-издөө иш-чараларынын натыйжасында шектүү К.З. кармалып, убактылуу кармоо жайына жайгаштырылды.
Учурда анын башка кылмыштарга катышы текшерилип жатат. Эгерде кимдир бирөө К.З.нын аракеттеринен жабыр тартса, милиция 0700 38 70 07 жана 0990 01 90 90 телефон номерлери боюнча кайрылууну өтүнөт.
