Берилген маалыматка ылайык, 1-ноябрда 29 жаштагы Жинжиген айылынын тургуну Кызыл-Кий шаардык ички иштер бөлүмүнө арыз менен кайрылган. Ал ошол эле күнү, саат 19:00 чамасында, «ГАИ посту» аймагында белгисиз адамдар анын 80 миң сомдук уйун уурдап кеткенин билдирген.
Бул окуя Кызыл-Кий шаардык ИИБдин электрондук каттоо журналында катталган, андан кийин Кыргыз Республикасынын Кылмыш кодексинин мал уурдоо боюнча беренеси боюнча кылмыш иши козголгон.
Оперативдүү-издөө иш-чараларынын жүрүшүндө шектүү катары үч эркек киши кармалган: 37 жаштагы Караван айылынын тургуну М. У., 46 жаштагы Кадамжай районунун тургуну М. Ж. жана 35 жаштагы Төө-Моюн айылынын тургуну К. уулу С. Бардык кармалгандар убактылуу кармоо жайына жайгаштырылган.
Учурда бул иш боюнча тергөө иштери улантылууда.
