2025-жылдын 10-декабрында Пекинде, Шанхай кызматташтык уюмунун Секретариатында, Кыргызстандын Туруктуу өкүлү Рахман Аданов атайын брифинг өткөрдү. Ал ШКУга катышкан өлкөлөрдүн туруктуу өкүлдөрүнө жана Секретариат кызматкерлерине 16-ноябрда Ташкентте өткөн Борбордук Азия мамлекеттеринин башчыларынын Консультативдик жолугушуусунда кол коюлган документ тууралуу маалымат берди. Бул документте «Регион мамлекеттеринин башчыларынын Кыргыз Республикасын 2027–2028-жылдарга БУУнун Коопсуздук Кеңешине убактылуу мүчө болуп шайлоого сунуштоо боюнча БУУга кайрылуусу» камтылган.
Рахман Аданов бул кайрылууда Кыргызстанды БУУнун Коопсуздук Кеңешине сунуштоо Борбордук Азиянын дүйнөлүк аренада тынчтык жана туруктуулукту сактоого салым кошуу ниетин билдирерин белгиледи.
Ошондой эле, ШКУдагы КРдин Туруктуу өкүлү, ийгиликтүү шайлануу учурда Кыргызстан БУУнун Коопсуздук Кеңешинин жооптуу мүчөсү болуп, глобалдык тынчтык, коопсуздук жана заманбап дүйнөлүк чакырыктарды чечүүгө активдүү катыша турганын кошумчалады.
Жолугушууда ошондой эле Өзбекстандын ШКУ Секретариатындагы Туруктуу өкүлү Саидкамол Агзамходжаев сөз сүйлөп, 2025-жылдын 16-ноябрында Ташкентте өткөн Борбордук Азия мамлекеттеринин башчыларынын Консультативдик жолугушуусунун жыйынтыктары менен бөлүштү.
