16-декабрда Индиянын борбору Нью-Дели шаарында «Дүйнө - бир үй-бүлө» аттуу эл аралык илимий конференция өттү, бул тууралуу «Манас» улуттук академиясы маалымдады. Иш-чарада «Манас» улуттук академиясынын Коммуникациялар жана эл аралык байланыштар борборунун жетекчиси, PhD доктору Гульзат Майчинова жана «Айкол» студиясынын жетекчиси Дастан Чыныбек уулу сыяктуу эксперттер катышты.
Гульзат Майчинова «Манас жана Махабхарата: тынчтык жана коопсуздук үчүн маданий цивилизациялык коду» темасындагы презентациясында эки эпостун эл аралык баалуулуктарды, тынчтыкты жана элдер арасында макулдукту бекемдөөдөгү маанилүүлүгүн белгиледи.
Дастан Чыныбек уулу «Эпикалык көпүрөлөр: «Манас» жана «Махабхарата» эпосторунун маданий баалуулуктарын глобализация шартында театр аркылуу сактоо жана илгерилетүү» темасындагы докладын сунуштап, театрдык көрсөтүүлөрдүн маданий мурастын сактоодогу маанисине көңүл бурду.
Ошондой эле конференцияга Кыргызстан, Казакстан, Өзбекстан, Тажикстан, Эфиопия, Мадагаскар, Малайзия, Вьетнам, Мьянма, Кения, Индонезия жана Индиядан келген илимпоздор катышты. Чет өлкөдөн келген катышуучулар кыргыз элдин тарыхы жана маданияты, ошондой эле «Манас» эпосу боюнча жандуу кызыгуусун билдиришти, докладчыларга көптөгөн суроолор беришти.
«Көптөгөн катышуучулар Кыргызстанга келип, «Манас» эпосу жана маданияты менен жакындан таанышуу ниеттерин билдиришти. Конференция маданий диалогду бекемдөөгө жана эл аралык илимий кызматташтыкты өнүктүрүүгө көмөктөштү», - деп айтылат билдирүүдө. ```
