Сөзүндө ал Кок-Жар айыл өкмөтүнүн жергиликтүү башкаруу техникалары менен камсыз болушу маселесин да козгоду. Анын айтымында, административдик реформа натыйжасында үч айыл өкмөтү бириктирилген, анда 35 миңден ашык адам жашайт. Бирок, калктын саны көбөйгөнүнө карабастан, жергиликтүү бийлик атайын техникалардын жетишпестигин сезүүдө. Делегат экскаватор жана таштанды чыгаруучу техникаларды берүү өтүнүчүн билдирди.
Мындан тышкары, Бузайнап бириктирилген айылдарда таза ичүүчү сууга жеткиликтүүлүк маселеси бар экенин белгиледи. Учурда суу булагы кудук болуп саналат, бирок бул жетишсиз. Ал Чили-Сай дарыясынан Талды-Булакка чейин суу түтүктөрүн тартууну сунуштады, бул үч айылга суу менен камсыз кылат.
Ошондой эле делегат Кызыл-Тейит айылындагы айыл чарба жерлерин сугаттоо боюнча кыйынчылыктар жөнүндө маалымдады. Анын маалыматына ылайык, 90 гектардан ашык жерлер суу жетишпестигинен пайдаланылбай жатат. Бул боюнча ал суу менен камсыздоону жана сугаттоону жакшыртуу үчүн чараларды көрүүгө чакырды.
