13-январда Эр-Риядда Кыргызстандын Саудия Аравиясындагы элчиси Улукбек Марипов энергетика министринин орун басары Мухаммед Абдульрахман Ибрахим менен жолугушту.
Кыргыз Республикасынын Тышкы иштер министрлигинин маалымат кызматынан билдиришкендей, катышуучулар энергетика секторундагы биргелешкен иштешүү мүмкүнчүлүктөрүн, анын ичинде Кыргызстанда жайгашкан жаңылануучу энергия булактарын — күн жана шамал электр станцияларын, ошондой эле кичи жана ири гидроэлектр станцияларын куруу долбоорлорун ишке ашырууну талкуулашты.
Марипов Кыргызстан менен Саудия Аравиясынын энергетика министрлиги менен кызматташтыкты активдештирүүгө кызыкдар экенин, анын ичинде мунай продуктуларын сатып алуу боюнча маселелерди белгиледи. Ал ошондой эле энергетика тармагында бир катар инвестициялык долбоорлорду сунуштап, «жашыл» долбоорлорду көмүртек кредиттерине алмашуу боюнча кызматташуу мүмкүнчүлүгүн талкуулоону сунуштады.
Мухаммед Ибрахим, өз кезегинде, энергетика жана соода тармагындагы байланыштарды бекемдөөнүн зарылдыгына макул болуп, өз ара кызыккан бардык маселелер боюнча колдоо көрсөтүүгө даяр экенин билдирди.
Жолугушуунун аягында Улукбек Марипов Мухаммед Ибрахимге Кыргыз Республикасынын энергетика министри Таалайбек Ибраевдин Саудия Аравиясынын энергетика министри, принц Абдельазиз бин Салман Аль-Саудга жөнөткөн билдирүүсүн тапшырды. Ал билдирүүдө Кыргызстанга өзүнө ылайыктуу убакта келип кетүүгө чакыруу жасалган.
