Талас облусунун казыятынан алынган маалыматка ылайык, Рысбек Кокумов 2024-жылдын 1-ноябрында кызматка дайындалган, 12-февралда болгон окуядан кийин реанимацияда көз жумду.
Turmush маалымдагандай, таңкы саат 10:00 чамасында Тараз—Талас—Суусамыр автожолунун Ак-Калпак участкасында (Талас менен Кен-Арал айылдарынын ортосунда) жол кырсыгы болду.
Алдын ала маалыматтар боюнча, батышка карай бараткан «Chevrolet Cobalt» унаасы тайгак жолдо обгон учурунда башкарууну жоготуп, «Mercedes-Benz Sprinter» микроавтобус менен кагышкан.
Кагылышуунун натыйжасында эки адам, ар бир унаадан бирден, оор жаракат алып, реанимацияга жөнөтүлгөн. «Chevrolet Cobalt» кызматтык унаа катары колдонулган деп болжолдонууда.
Жол кырсыгы тууралуу маалыматты Талас облусунун ИИМдин ООБДДсы тастыктады; кызматтык унаа казыятка таандык.
Рысбек Кокумов 1980-жылдын 31-январында Талас облусунун Бакай-Атин районунда жарык дүйнөгө келген.
Билими:
- 2007–2011-жылдар - «Али ибн Аби Талиб» медресеси (Талас шаары);
- 2014–2017-жылдар — Кыргызстан Ислам университети;
- 2019-жыл — ОсОО «Эркин ОПК» окуу борборун аяктаган;
- ошондой эле Талас мамлекеттик университетинин 3-курсында билим алган.
Кесиптик ишмердүүлүгү:
- 2010–2019-жылдар — Бакай-Атин районундагы Кыргызстан айылында имам-хатиб;
- 2021–2023-жылдар — Талас шаарынын башкы имам-хатиби;
- 2023–2024-жылдар — Талас облусунун казыятында мечиттер жана медреселер боюнча адис;
- 2024-жылдын 1-ноябрынан тарта — Талас облусунун казысынын орун басары.
Рысбектин артында жубайы жана үч кызы калды.
