Жаңы Дин башкармалыгынын уставына ылайык, казыяттар эми өкүлчүлүктөр деп аталат, ал эми казы — өкүлдөр.
Жаңы диний өкүлдү диний коомчулукка муфтияттын орун басары Шүкүр Исмаилов тааныштырды. Жолугушууга ошондой эле президенттин алдындагы Диндер жана этностор аралык мамилелер боюнча улуттук агенттиктин регионалдык өкүлү Курманбек Шайыков, Жалал-Абад облусундагы муфтияттын өкүлү Эрик Молдокулов, казыяттын кызматкерлери жана башкы имам-хатибдер катышты.
Нарын облусундагы президенттин ыйгарым укуктуу өкүлү Нурбек Сатаров менен жолугушууда эки тараптуу кызматташуу маселелери талкууланды.
Нуридин Үсөнович Мамасабиров 1983-жылдын 13-январында Баткен облусунун Баткен районундагы Кыштут айылында диний ишмерлердин үй-бүлөсүндө төрөлгөн.
Билими:
- Кыргызстан Ислам университети, адистиги «араб тили жана шариат»;
- Баткен мамлекеттик университети, социалдык-экономикалык билим берүү багыты.
Эмгек иши:
- 2005-2006 жылдар — Ислам университетинде жалпы бөлүмдүн орун басары жана хадис мугалими;
- 2006-2012 жылдар — Чүй облусунун Аламедин районундагы «Азирети Сулайман» мечитинин имам-хатиби;
- 2012-2017 жылдар — Баткен районунун башкы имам-хатиби;
- 2017-2021 жылдар — Баткен облусунун орун басар казысы;
- 2021-жылдын 26-июнунан бери — Улемдер кеңешинин мүчөсү (Кыргызстандын мусулмандарын VII курултайынын чечими боюнча);
- 2021-жылдын 20-августунан бери — Баткен облусунун казысы (ДУМКнын региондогу өкүлү).
Ал араб, түрк, орус жана өзбек тилдерин билет.
Нуридин Мамасабиров үйлөнгөн, эки уулу жана эки кызы бар.
